RAP DI KONDENADU
Xutadu la pa jolapa falta di kaxola
na ponta di pistola
kel li ki foi nha skola
Na bairu mi é bodona
pa mi é tudu dona
famadu N ta da tapona
ki fari matxu sorna
Na meiu barakada
N prende da finkada
ami na nha pasada
é rai ta subi skada
Armadu o dizarmadu
na zona N ta txomadu
óra ki tiru bazadu
la beku di kemadu
N prende pa N ka more
N xinta pa N ka kore
N bende txon nha kôri
pa N fika la na tôri
Na bespa kinzi anu
ami N bai di kana
es fla-m «bo é bakanu
más li so ten sakana»
Obidu ben abertu
pa N obi son di guarda
si matxu txiga pertu
kamuga na ndjarga
Di noti N ta matuta
na stória di nha bida
paródia briga furta
ku bofia N ta rabida
Nha spritu djagasidu
ta txora liberdadi
nha nomi é pirsigidu
pamodi N fla verdadi
Na txabi N sta trankadu
ku fama malkriadu
nha sal ka ta purbadu
nen na óra minguadu
Kontadu rakontadu
mandadu la pa dentu
N kreba bira bentu
pa N sai pa tudu ladu
Ami N ka limária
pa N podu na korenti
nha denti xeiu kária
é eransa disendenti
Txikradu mo bixeru
ami nha bida é zeru
ami si N fase éru
kulpadu é dizusperu
Nha mai ta lamenta-m
nha pai ta maldisua-m
más si matxu palpa-m
ka t´odja palmanhan
Pamódi di buazona
N poi lumi na zona
N fase krus na petu
N salta parapetu
Ku gana bira dretu
más N ka sta atxa getu
es stória di ruspetu
e ten ki ben di dentu
Nha bida dipalbesa
pamódi nha kabesa
si mi N ka grandi pésa
algen djuda na résa
Distinu kondenadu
é mueda so dun ladu
pa undi ki viradu
é senpri kusa mariadu
José Luis Tavares
