LOVOR PA GROGU
Poema de José Luis Tavares
Di kalda ben stiladu
na rubera más fundu
e ben p´e alegra mundu
ku si spritu tenpradu
é soris di tripitxi
ta ronka dia ku noti
mininu di sibitxi
ta bua ta da pinoti
pagadu ô ku kaloti
na mansu ô ku fadiga
é más ki agu na poti
é lumi ta spadjiga
di fundu di rubera
si folgu ta labanta
ta ben linpa garganta
di tudu raspa puera
na flor di tenpu seru
e foi nha amor prumeru
nha kurason interu
e fase si tereru
ben lonji di fornadja
na prasa ô undi kadja
si kredu N ta spadja
ta loba y ta badja
ami na el N ta kre
ku tudu forsa fé
sikre manku d´un pé
N ta sigi-l simé
xintadu N ta toma-l
albês di pé ta bai
na ponta padjigal
ta nderia ka ta kai
na tereru batuku
si vós t´obidu senpri
na meiu breu trubuku
é sol ta ratxa ventri
na renu nha zabel
é veri tipikal
sabura sen igual
é la txada belbel
fobadu ta bebe-l
y riku na sobradu
mi N sta na nha papel
di fla m´é lus sagradu
é parti nós kultura
amigu di tudu altura
na noti di margura
ô bespa di sabura
na pó di kankaran
li undi nhos sta odja-m
na petu N ta da-l kran
na fiu di palmanhan
na krus di solidon
é más ki kumunhon
nhos toma-l ku midida
pa ka kai pa rabida
nu rasa-l orason
ku tudu imuson
tronbeta ku violon
pa ser nós kurason
mas sabi é ku midida
pa ka txoradu bida
ka nhos fase-l kumida
ó fidjus di parida
JOSÉ LUIZ TAVARES
jlpoeta@hotmail.com
